Ovo je hrvatski vojnik ubijen u Avganistanu: Nedavno se oženio i dobio dijete

0
115

Hrvatski vojnik Josip Briški (27), koji je poginuo nakon današnjeg napada talibana u Avganistanu, živio je u Sesvetama, a kako kaže njegov komšija, bio je marljiv i pošten momak.

“Rijetko sam ga viđao otkad je otišao u vojsku. Nedavno se oženio i dobio dijete”, kaže komšija stradalog hrvatskog vojnika.

Briški je u Hrvatskoj vojsci bio pet godina, a misija u Avganistanu bila mu je prva međunarodna misija. Bio je pripadnik 10. Hrvatskog kontingenta koji se nalazio u NATO mirovnoj misiji “Resolute Support” u Avganistanu. Tamo je bio angažovan na poslovima savjetovanja Avganistanskih bezbjednosnih snaga.

Prema pisanju “Jutarnjeg lista”, Briški je imao sina koji je tek napunio godinu dana. Stanovali su s njegovim roditeljima i sestrom u Sesvetama.

“Boljeg čovjeka niste mogli upoznati”

“Ma boljeg čovjeka od Josipa nisi mogao da upoznaš. On je stvarno živio za tu vojsku i jako se trudio. Bio je vrhunski u svemu i zato je bio u Jedinici za specijalna djelovanja”, ispričao je za “24sata” jedan od prijatelja pokojnog Josipa.

S njim je bio u vojsci u Slunju gdje su obojica provela godinu dana. Karijera ih je prije nekoliko godina odvela na različite strane, ali ostali su u kontaktu.

“Radio sam nešto van kuće i prvo uopšte nisam znao za njegovo poginuće. Brat je izašao iz kuće i to mi je rekao. Nisam mogao da vjerujem. Josip to stvarno nije zaslužio. Bio je momak za poželjeti”, kaže neutješni kolega.

Ministarstvo odbrane i vojska Hrvatske izrazili su žaljenje i oštro su osudili napad.

Podsjećamo, bombaš samoubica je u srijedu u jutarnjim satima napao vozilo Hrvatske vojske u Kabulu u Avganistanu.

“To su bila oklopna, ali neborbena vozila. Bombaš samoubica na motociklu zaletio se u naše treće vozilo 200 metara od kampa. Na mjesto nesreće prvo su izašle avganistanske snage za brzi odgovor, potom i zaštitne snage iz kampa koje su osigurale područje”, rekao je brigadir Krešimir Tuškan.

Potpredsjednik Vlade i ministar obrane Damir Krstičević posjetio je porodicu preminulog pripadnika Hrvatske vojske.

“U ovim najtežim trenucima za Hrvatsku vojsku i Ministarstvo obrane u ime svih pripadnika Hrvatske vojske, djelatnika Ministarstva obrane i u svoje lično ime izražavam iskreno saučešće. Ovu tužnu vijest primio sam s bolom i težinom u srcu. Ovaj trenutak duboko pogađa svakog pripadnika porodice hrvatske vojske i hrvatski narod. Zaista, ne postoje riječi utjehe, niti bilo čega što može da vrati mladi život. Hrabro i časno u vječnost je otišao naš sin, vojnik, muž i otac i stao uz rame najvećih velikana i ratnika. Počivao u miru”, rekao je Damir Krstičević.

(24sata.hr)

PODIJELI

OSTAVITI ODGOVOR

Please enter your comment!
Please enter your name here